Nagpabutyag sang kabalaka ang August Twenty-One Movement (ATOM) sa pag-dismiss sang Special Division sang Sandiganbayan sang nabilin nga asset claims sa forfeiture case nga may kaangtanan sa gin-akusaran nga ill-gotten wealth sang anay presidente nga si Ferdinand Marcos Sr. kag anay First Lady Imelda Marcos.
Sa interview sang Bombo Radyo kay Volt Bohol, presidente sang ATOM, iya ginpahayag nga kun may mga kaso nga na-dismiss may kaangtanan sa pamilya Marcos, ini ang bangud sa technicality ukon legal nga rason kag indi bangud napamatud-an nga wala sang kamatuoran ang mga alegasyon.
Posible suno kay Bohol nga indi na maghulag pa ang kaso bangud anak ni Marcos Sr. nga si Ferdinand “Marcos” Jr. ang presidente subong.
Pahayag niya, luyag sang grupo nga magserbe bilang gwardya sang kasaysayan bangud nakit-an nila ang epekto sang kabutigan kag pagbag-o sa kasaysayan sang Pilipinas.
Ang pagbalik sang Marcos Family sa Malacañang wala kuntani natabo kun wala ang mga ini nagbinutig tuhoy sa mga natabo sadto sa pungsod.
Ginbalikan man ni Bohol ang katungdanan ni former President Rodrigo Duterte sa pagbutang sang bangkay ni Marcos Sr. sa Libingan ng mga Bayani kag ginlaragway sini bilang major example sang ginatawag sang grupo nga pagbag-o sang kasaysayan.
Para sa iya, ang latest court action wala lang nahanungod sa isa ka kaso sa baylo nagapatuhoy ini sa accountability kag ang kinahanglan nga pagpaathag sang kasaysayan sang pungsod kag ang kamatuoran para sa masunod nga mga henerasyon.
