ROXAS CITY – Nagpaguha sang Executive Order No. 13 series of 2020 ang alkalde sang syudad.
Kaundan sang EO nga ginpaguha ni Mayor Ronnie Dadivas ang pag-establisar sang border security kag quarantine protocols sa Roxas City bilang preventive measure batuk sa coronavirus disease 2019 ukon COVID-19.
Ginpahayag sang alkalde nga sakup sang EO ang pagdumili sa tanan nga mga passenger vessels nga makadungka sa seaports kag mga wharfs sa syudad sang Roxas.
Kalakip diri ang Culasi Port, Banica Port, Libas Port, Barangay Barra, Cogon, Punta Cogon, Olotayan, Baybay, Talon, Culajao kag Tanza, Roxas City.
Mapahanugutan lamang nga maka-unload sang karga ang mga cargo vessels sa diin isa ka driver kag duha ka helper ang magapanaug kag kinahanglan nga magsunod sila sa quarantine protocols.
Samtang ginsuguran na ang istrikto nga implementasyon sa pagtsekyar sa tanan nga magasulod nga mga salakyan sa entrance kag exit points sang syudad agud masiguro ang seguridad sang mga pumuluyo kag malikawan ang epekto sang COVID-19.
Nahibaluan man nga magapaidalum sa security kag quarantine protocols ang magasulod sa syudad sang Roxas.
