Ginpasidunggan bilang Silver Award ang talatapan sang PAG-IBIG Fund-Roxas Branch nga nagikan sa Anti Red Tape Act- Report Card Survey ukon ARTA-RCS nga ginhiwat sa Conrad Hotel Manila, Pasay City.
Sa ginhiwat nga Fund Coordinators’ and Employer Representatives’ Year-end Assembly 2024 sang Pag-Ibig Fund Roxas, sa isa ka resort diri sa syudad, sa subong nga adlaw, bugal nga gin anunsyo ni Mr. Rolando E. Gilo- Branch Head sang Pag-Ibig Fund Roxas nga ang ila sini talatapan ang ginpasidunggan sang ARTA RCS bilang Silver Awardee matapos nga nakapagkit sang Very Satisfactory Rating sa ginpatigayon nga Report Card Survey sang ARTA.
Dugang pa sini, madamo nga criteria ang ginpaguwa sang ARTA agud magserbe nga guidelines sang ila nga talatapan sa amu nga kahiwatan.
Personal nga ginbaton ni Mr. Rolando E. Gilo bilang taglawas sang PAG-IBIG Fund Roxas Branch sa idalum sang supervision ni Ms. Marivic E. Agot -Area Head, sang PAG-IBIG Fund, Western Visayas ang amu nga award.
Mahibaluan, nga sa 12 ka mga branches nationwide sang PAG-IBIG Fund nga ginpasidunggan, TOP 1 ang PAG-IBIG Fund Roxas Branch.
Daku naman ang pasalamat sang Branch Head sa mga co-workers sini sa serbisyo kag dedikasyon nga ila ginapakita kag sa mga miyembro nga aktibo nga nahiusa sa paghatag sang feedback natuhoy sa performance sang amu nga talatapan.
Samtang, nagalaum naman ang nasambit nga talatapan nga sa masunod nga mga kahigayunan, mapagkit na sini ang GOLD AWARD.
