ROXAS CITY – Nagabaton na sang aplikasyon ang Pag-ibig fund Roxas City branch, para sa calamity loan sang mga aktibo nga miyembro.
Sa interview sang Bombo Radyo kay Mr. Roland Gilo, branch head sang PAG-IBIG Roxas, suno diri nga nagatan-ay sang Calamity loan ang ila ahensya sa mga miyembro nga nakadeklarar sang State of Calamity ang ila lugar, kaangay sang: Adlawan, Bago, Bato, Bolo, Lanot, Li-ong, Loctugan, Milibili kag San Jose sa syudad sang Roxas, kag ang mga kabanwahan sa probinsya sang Capiz, magluwas sa Ivisan, Jamindan kag Sapian.
Mahimo nga maka-avail sang nasambit nga loan ang isa ka kwalipikado nga miyembro kun ini ang:
May kontribusyon sang 24 ka bulan
May membership savings sa sulod sang anum ka bulan antes ang aplikasyon
Kun may existing nga PAG-IBIG loans, dapat updated ang pagbayad
Dapat wala maka-avail sang calamity loan sa sulod sang anum ka bulan
Dugang pa ni Gilo nga mahimo maka-loan ang miyembro tubtob 80% sang ila total savings kag may yara gid lamang sang 5.95% nga interes per annum, nga mahimo mabayaran tubtob duha ukon tatlo ka tuig.
Sa mga luyag mag-apply, mahimo nga magproseso pinaagi sa mga masunod:
Virtual ukon online pinaagi sa website www.pagibigfund.gov.ph ukon
magpadulong sa ila opisina kag mag fill-out sang pormas
Kinahanglan man suno diri, nga magproseso sang PAG-IBIG Loyalty card agud diri iga-deposit kun maaprubahan ang nasambit nga loan.
Ginapasalig man sang Branch head nga pinakalawig na ang 3 ka adlaw nga pagproseso sang amu nga loan.
Ginapahibalo man sang ahensya nga tubtob nalang sa Hulyo 2022, ang aplikasyon sang calamity loan.
