Naglunsyar ang Pag-IBIG Fund sang isa ka espesyal nga offer nga may 4.5% interest rate para sa mga home loan nga magalab-ot tubtob P1.8 milyon agud mabuligan ang tagsa ka mga pamilya nga Pilipino nga makaangkon sang kaugalingon nga balay.
Sa opisyal nga pahayag sang Home Development Mutual Fund (Pag-IBIG), ginsiling sini nga ang promo ang bukas para sa mga first-time homebuyers nga may bulanan nga income nga indi maglapaw sa P47,856 kun yara sa National Capital Region, kag indi maglapaw sa P34,686 kun yara sa guha sang Metro Manila.
Kalakip man sa mahimo nga makabenepisyo sa nasambit nga offer ang mga Overseas Filipino Workers (OFWs). Subong man, gin-athag sang ahensya nga ang promo ang limitado lamang sa una nga 10,000 ka mga lokal nga aplikante kag una nga 1,000 OFW applicants.
Suno kay Pag-IBIG Fund CEO Marilene Acosta, mahimo nga makatipid sang halos P2,000 kada bulan ang isa ka miyembro na magapangutang sang P1.8 milyon sa idalom sang 30 ka tuig nga hulugan. Kabaylo ini sang mas ukon menos P71,000 sa una nga tatlo ka-tuig, kun ipaanggid sa regular nga interest rate nga 6.25%.
Sa idalom sang promo rate, ang bulanan nga hulogan ang yara sa P9,120.34, mas manubo kun ipaanggid sa P11,082.91 sa regular nga interest rate. Sang tinalikdan nga bulan, naglunsyar man ang Pag-IBIG sang diskwento nga 10% para sa mga naga-istar sa mga foreclosed properties sang ahensya, agud hatagan sila sang tyansa nga mabakal ang ila nga gina-istaran.
