ROXAS CITY, CAPIZ- Isa ka maayo nga kahigayunan para sa publiko ang maimbestigaran kag sa karon ginapokusan nga isyu sa pungsod ang may kaangtanan sa maanomaliya kag palpak nga flood control projects sang gobyerno.
Sa interview sang Bombo Radyo kay Attorney Joenar Pueblo, Presidente sang Philippine Arbitration Center in the Visayas, iya ginpahayag nga ang kaangay nga kalakaran sa pungsod ang madugay na kag dako nga sahi sang scam nga nagakahinabo.
Suno sa iya, ini na ang insakto nga panahon agud mahibaluan ang kabangdanan sang amo nga mga palpak nga mga proyekto kag mapasabat ang kinahanglan nga magpanabat.
Ginpahayag pa sini nga isa ka ‘white elephant concept’ ang nasambit nga mga proyekto. Narekord lang suno sa iya nga naumpisahan na, apang wala matapos.
Pag-abot sa mga ginapahayag nga may pila ka mga contractor sang proyekto ang mga kaparyentehan sang pila ka mga kongresista, isa lang suno sa iya ang iya ginlantaw nga rason ini bangud nga sa tion sang kampanya, nagabulig ini kabaylo sang mga proyekto pagmakapungko na sa pwesto.
Dugang pa ni Pueblo, indi dapat nga pagpalutson sang Department of Public Works and Highways ang mga anomaliya. Kinahanglan nga tapuson ang proyekto nga ginbay-an kag ipasabat sa orihinal nga kontratista.
Kinahanglan man suno sa iya diri nga i-ban ang mga nagalapas sa layi nga mga kontratista ka gang mga pasaway nga kontraktor. Samtang, para sa iya, nagakadapat gid nga mapa-subpoena kag makapaathag ang mga kontratista nga wala magtambong sa amo nga hearing sang nasambit nga komiteba.
Ginsiling pa ni Pueblo nga importante mangin transparent ang tanan nga government projects. Suno sa iya, responsibilidad sang Department of Public Works and Highways ang monitoring, samtang may gahom man ang Kongreso kag Commission on Audit nga imbestigaran ang paggasto sa pondo.
Para kay Atty. Pueblo, ini ang kahigayunan agud mapukaw ang publiko sa mga korapsyon nga madugay na nga nagakatabo sa likod sang mga flood control projects sa pungsod.
Interviewed by Bombo Francis Biñas
