ROXAS CITY – Nagpanindugan si Mayor Ronnie Dadivas nga samtang ginahulat ang mangin sabat sang National Inter Agency Task Force (NIATF), suguran na sang gobyerno ang intervention ukon mga tikang agud matapna ang paglapta sang COVID-19.
Suno sa alkalde nga istrikto nga ipatuman ang pagsulundan pag-abot sa minimum health protocols.
Ginhinyo man sang alkalde ang kooperasyon sang mga pumuluyo sang Roxas City kalakip sang mga indibidwal nga nagpadulong sa syudad.
Ginklaro sini nga indi lamang ini trabaho sang gobyerno ang pagtapna sa COVID-19 bangud tanan ang dapat nga maghimo sang ila nga bahin agud indi na maglapta kag indi magtaas ang COVID-19 cases.
Samtang ginpasalamatan ni Mayor Dadivas ang Simbahan Katolika kag mga religious groups sa Capiz bangud sa pagsuspende sa daily masses kag Sunday masses, sa ini nga pamaagi indi na magtumpok pa ang mga tawo kag malikawan ang paglapta sang COVID-19.
Ginpasalig man sang opisyal ang pagbulig sa transport sector bangud isa man ang mga tricycle drivers/operators sa maapektuhan kun ipaidalum liwat sa MECQ ang Roxas City sa diin malimitahan ang movement sang mga tricycle bangud magalaka na lamang ang mga pasahero.
Ginpasiguro pa ni Dadivas nga unahon sa distribution sang bugas ang mga tricycle drivers.
