ROXAS CITY – Nadayon subong nga adlaw sang Lunes, ang pagkultibar sang mga Agrarian Reform Beneficiaries (ARB’s) sa Barangay Culilang, banwa sang President Roxas.
Ini ang ang ginkumpirmar ni Ms. Carlette Caldeo, head executive assistant sang Provincial Agrarian Reform Office (PARO) sang mainterview sang Bombo Radyo.
Suno diri, wala sang makapauntat sa nagapadayon nga programa sang Department of Agrarian Reform (DAR) apisar may pending nga kaso nga ginpasaka sang nagapungko administrador kag Punong Barangay Ferdinand Bacanto.
Pahayag ni Caldeo nga Temporary Restraining Order (TRO) gid lamang ang mahimo nga makapauntat sa ila.
Matandaan nga ginapanidugan ni Bacanto nga iligal ang ginpatigayon nga proseso kag installation sang nasambit nga ahensya sa duta nga ginapanag-iyahan sang pamilya Tan.
Bangud sa alegasyon sang Punong Barangay, ini man ang rason nga temporaryo ginpaiway ni President Roxas Mayor Receliste Escolin ang paghiwat kuntani sang aktibidad sadtong adlaw sang Miyerkules.
Nahibaluan nga may masobra 100 ka mga ARB’s nga gintugyanan sang duta pinaagi sa Comprehensive Agrarian Reform Program (CARP) sang gobyerno.
Nakit-an man ang presensiya sang mga katapo sang kapulisan kag suldado sa lugar agud mamentinar ang kalinong kag mapabilin ang seguridad sang mga ARB’s kag iban pa nga nagatambong sa amu nga aktibidad.
