ROXAS CITY – Nagakadapat lang suno sa Provincial Veterinarian nga mag-leave na ang probinsya sa state of calamity bangud wala na sang may natabo nga outbreak sa pila ka mga kabanwahanan.
Ini ang ginpahayag ni Dr. Leonel Abordo Provincial Veterinarian, sang mainterview sang Bombo Radyo.
Suno kay Abordo, matapos ang halos masobra isa ka tuig nga gin-igo sang African Swine Fever (ASF) ang mga hinupatanan nga mga baboy sa probinsya wala na sang outbreak nga natabo.
Ginpahayag man sini ang pila ka mga rason kung ngaman kinahanglan na nga magleave ang probinsya sa state of calamit bangud una indi na suno diri masako ang paglaton sang balatian sa mga baboy.
Mahibaluan nga nagahimo na sang mga programa kag nagapanikasog ang kada municipal government nga apektado ukon yara sa mga red zone agud maconvert ini sa pink zone kalakip na diri ang pagsumite sang mga papel para sa evaluation.
Pila sa mga banwa ang yara na sa pink zone kaangay sang banwa sang Maayon, Dumarao, Cuartero, Dao, kag Mambusao.
Ginsiling pa ni Abordo nga nagpatigayon na sila sang swab sample sa mga pig facility kag ginpaidalum sa laboratory kun sa diin nangin negative ang resulta.
Pananglitan suno diri nga mangin hagan-hagan na ang mga kaso kag magabalik na sa green zone mahimo na nga mabalik ang pangabuy-anan sang mga hog raiser pinaagi sa restocking.
Nagalaum man ini nga bangud nag-abot na ang bakuna kontra ASF sa pungsod makaganar na ang probinsya agud mabalik sa normal ang pag-atipan sang mga baboy.
