ROXAS CITY – Ginahinalaan pa ang plano nga pagpaidalom sa lockdown sa Taipei, ang capital city sang Taiwan bangud sang coronavirus disease (COVID-19) pandemic.
Ini ang base sa report sa Bombo Radyo ni Bombo International Correspondent Charlene Esmolada Tamzen.
Suno kay Tamzen, ginahinalaan pa sang gobyerno sang pungsod kun magapatuman ini sang lockdown ilabi na kun magapadayon ang pagsaka sang kaso sang nasambit nga balatian sa pungsod.
Ginpahayag pa sini nga wala sang panic-buying nga nagakahinabo sa pungsod bangud ginpasiguro man sang gobyerno nga wala sang shortage nga matabo sa suplay sang mga nagapanguna nga balaklon.
Sa karon nagapabilin nga normal ang sitwasyon sa pungsod kun sa diin wala pa sang may ginapatuman nga curfew.
Dako man nga bulig ang pagsunod sang mga residente sa mga otoridad agud makalikaw sa nasambit nga balatian kalakip na ang pag-obserbar sang social distancing kag pagsuksok face mask.
Ginkompirmar man sini nga nadayon pa ang sikat nga lantern festival sa pungsod sang nakaligad nga bulan sang Marso.
