Pag-reclassify sang agricultural land, ginpa-untat anay sang Department of Agriculture

Ginmandu ni Agriculture Secretary Francisco Tiu Laurel Jr., ang gilayon nga pag-untat sang tanan nga aplikasyon para sa agricultural land reclassification agud protektahan sang Department of Agriculture (DA) ang mga uma kontra sa madasig nga pag-convert sang farmland.

Sa Department Circular No. 1 nga ginpirmahan sang Enero 5, ginpatuman ni Tiu Laurel ang moratorium sa pagbaton kag pagproseso sang Land Use Reclassification Certification applications.

Epektibo ini gilayon kag magalawig tubtob Hunyo 2026.

Katuyuan sang sini nga tikang ang maghatag sang tion sa DA agud ma-review liwat ang ila mga regulasyon kag mapabaskog ang pagbantay bangud sa nagadako nga demand halin sa urban expansion kag infrastructure projects nga nagakuha sang farm areas.