ROXAS CITY, CAPIZ – Padayon ang pag-init sang tensyon sa tunga sang isyu sang impeachment batuk kay Vice President Sara Duterte, kasunod sang desisyon sang Senado nga i-remand ukon ibalik sa Kamara ang Articles of Impeachment nga gin-file batuk sa Bise Presidente.
Apang kadungan sang nasambit nga tikang amo ang pagtuhaw sang mga espekulasyon kag pagpakamalaot gikan sa pila ka sektor, nga nagapahayag posible nga may halo nga personal nga interes ang pila ka senador sa desisyon.
Sa interview sang Bombo Radyo Roxas Atty. Joenar Pueblo, Presidente sang Philippine Arbitration Center in the Visayas, iya ginpapahayag nga importante nga usisaon sang publiko ang matuod nga motibo sa likod sang desisyon sang Senado nga ibalik sa Kamara ang Articles of Impeachment batuk kay Vice President Duterte.
Suno kay Pueblo, indi mapanginwala nga may mga senador nga kilala nga kaalyado ukon malapit sa pamilya Duterte, kag mahimo nga ginagamit ang posisyon agud balabagan ang impeachment proceedings pinaagi sa mga teknikalidad.
Dugang pa sang natungdan, apisar isa ka legal nga tikang ang remand, nagabilin ini sang palamangkutanon kun ang nasambit nga aksyon ang nagatuyo nga maklarohan ang reklamo ukon hungod nga balabagan ang paghulag sang impeachment sa Senado.
Ginsambit man sang abogado nga may pila ka senador nga may maathag nga koneksyon sa pamilya Duterte ukon sa mga kaalyado sini.
Sa amo nga konteksto, indi malayo nga paminsaron nga ang pag-remand ang mahimo nga ginagamit bilang political maneuver agud pahinayon ang kaso.
Pahayag pa sang natungdan nga indi dapat pagtugutan nga mangin instrumento ang Kongreso sa mga taktika nga magalapas sa prinsipyo sang checks and balances sang demokrasya.
