ROXAS CITY – Padayon sa karon nga ginapadalman sang mga kapulisan ang ila nga imbestigasyon sa natabo nga pagpang-snatch sang cellphone sa isa ka dalaga nga naga-jogging sa Pueblo de Panay, Barangay Lawaan, Roxas City.
Ini ang ginpahayag ni Police Master Sergeant Ramil Arcangeles, tagpamaba sang Roxas City Police Station sang mainterview sang Bombo Radyo.
Ang wala na ginhingadlan nga biktima ang naga-edad sang 18 anyos kag residente sang Barangay 10, Roxas City.
Mahibaluan nga naga-jogging ang biktima kaupod ang 14 anyos nga manghod sini kag iya pakaduha nga lalaki sa amo nga lugar.
Apang pag-abot sa kilid sang isa ka mall sa nasambit nga lugar, hinali na lamang nga may nagpundo nga Mio nga motorsiklo sakay ang wala makilala nga lalaki.
Diri kag ginkuha sang suspek ang cellphone sang biktima apang ginaalegar nga gin-uyatan pa kag ginkumos sang suspek ang dughan sang biktima.
Magluwas diri ginluok pa sang suspek ang nasambit nga biktima.
Kumbinsido man ang biktima nga nakakilala sa iya ang suspek bangud posible suno diri nga tuyo siya sini nga bastuson magluwas sa kuhaon ang iya nga cellphone.
Suno kay Arcangeles nga magapangusisa sila sa mga establisyemento malapit sa ginluntaran sang insidente.
Pagatsekyaron suno diri ang mga CCTV footages malapit sa lugar agud matumod ang suspetsado.
