ROXAS CITY – Minimal lamang ang mangin epekto sang pag-suspinde sang voter’s registration sang Commission on Elections (COMELEC).
Ini ang ginpahayag mismo sang tagpamaba sang komisyon nga si James Jimenez sang mainterview sang Bombo Radyo.
Suno kay Jimenez, indi man sang mangin dako ang epekto sang suspensiyon sa mangin turnout sang voter’s registration bangud malaka pa lamang ang nagapadulong sa mga local Comelec offices agud magparehistro.
Suno diri nga indi na bag-o sa ila ang malaka nga nagaparehistro bangud nakaandan na sang mga Pinoy ang ‘last minute’ registration.
Wala man ginakabalak-an sang komisyon ang posibilidad nga palawigon pa ang suspensiyon matapos ang himuon nga re-evaluation sa Marso 31 bangud tubtob sa Setyembre 2021 pa ang voters registration.
Mahibaluan nga gin-anunsiyo sang komisyon ang pagpaiway sang voter’s registration humalin Marso 10 tubtob 31 bangud sa coronavirus disease (COVID-19) outbreak sa pungsod.
