Dismayado ang alkalde sang banwa sang Sigma matapos nga ginhold ang backhoe kag ginkuha ang yabi samtang nagapatigayon sang quarry operation sa Barangay Acbo, Sigma, Capiz.
Ginpahayag ni Mayor Christopher Andaya nga ginkakibot sini sang mahibaluan nga gindakup ang nasambit nga heavy equipment nga naga-quarry sang lapok kag buga nga gamiton kuntani sa pagpatambak sa lubakon kag gubaon nga dalan sa mga barangay sa banwa sang Sigma bangud sa ginaalegar paglapas sa Ordinance No. 011 Series of 2019 sang Revised Revenue Code of the Province of Capiz.
Suno sa opisyal sang panahon ni anay Governor Antonio del Rosario indi na kinahanglan ang permit basta gamiton lamang ang lapok sa pagtambak sa mga lubakon nga mga barangay roads sang banwa.
Makatilingala lamang nga sa karon nga administrasyon ni Governor Esteban Evan Contreras kinahanglan na nga magkuha sang permit.
Ginapanindugan man sang alkalde nga sa ila man lamang nga barangay ginagamit ang ginatambak nga duta kag wala ini ginapahanugutan nga makaguha, rason nga indi sini mahangpan nga kinahanglan pauntaton ang quarry operation.
