Gintawag sang veteran trial lawyer nga si Lorna Kapunan nga “payback time” ukon serbisyo sa pumuluyo ang iya partisipasyon bilang isa sa mga private prosecutors sa impeachment trial ni VP Sara Duterte.
Pangunahan ni Kapunan ang napulo ka mga private prosecutor gikan sa tatlo ka mga law firm nga boluntaryo nga magaserbisyo nga wala sang bayad agud magbulig kag magpabakod sang House prosecution panel.
Suno kay Atty. Amando Virgil Ligutan sang SALiGAL Law, nagakadapat nga i-apply sang patas ang kasuguan sa tanan ano man ang ila kahimtangan sa kabuhi, samtang ginapahayag ni Atty. Marforth Fua sang PECABAR Law nga sila ang magaserbe nga giya agud masiguro ang nagakaigo nga pagsunod sa proseso sang hearing.
Ginalauman nga pormal nga maga-atubang ang una nga batch sang mga private attorney sa Senate impeachment court kadungan sang pag-file sang pre-trial brief sang House prosecution panel sa Hunyo 15.
