ROXAS CITY – Ginklaro ni Roxas City Mayor Ronnie Dadivas nga nasandig sa guidelines sang Department of Social Welfare and Development (DSWD) ang pagtumod sang mga kwalipikado nga benepisyaryo sang Social Amelioration Program (SAP).
Ini ang ginpahayag sang alkalde sang mainterview sang Bombo Radyo.
Suno sa alkalde nga ang mga kabaranggayan amo ang nagalista sang mga potential beneficiaries sandig sa guidelines sang DSWD.
Ang papel lamang sang gobyerno sang siyudad suno kay Dadivas amo ang pag-consolidate sang listahan sang mga kabaranggayan kag pagsumiter sini sa nasambit nga ahensiya.
Ginklaro man sang alkalde nga indi man ini makatugda sa pagpanagtag ukon pag-release sang amo nga ayuda sang ahensiya bangud ang mangin papel lamang sang gobyerno sang siyudad amo ang pag-assist sa ahensiya.
Ginkompirmar sang alkalde nga masobra 33, 000 ka mga households ang mangin resipyente sang nasambit nga ayuda sa siyudad sang Roxas.
Samtang ginpahayag sang alkalde nga padayon pa ang gobyerno sang siyudad sa pagpanghatag sang tunga sa sako nga bugas sa mga pumuluyo nga apektado sang ECQ.
Mahibaluan nga 30,000 ka tig- 25 kilos nga bugas ang unod kada sako ang ginpreparar sang gobyerno sang siyudad agud ibulig sa mga pamilya nga mas nagakinahanglan, nadulaan sang palangabuhian kag wala na sang makaon.
