Nagpaandam ang Philippine Atmospheric, Geophysical and Astronomical Services Administration (PAGASA) sa publiko angut sa posible epekto sang “short-lived” La Niña phenomenon nga nagakatabo subong sa tropical Pacific.
Suno sa advisory halin sa state weather bureau, ginalauman nga magalawig tubtob sa Pebrero sa masunod nga tuig ang mahuyang nga La Niña. Mahimo ini nga magtuga sang mabaskog nga pag-ulan, pagbaha, flashflood, kag rain-induced landslides sa pila ka mga lugar sa pungsod, ilabi na sa manubo nga mga lugar kag nabukid nga mga lugar.
Ang La Niña isa ka natural nga hitabo nga nagakatabo kon may yara sang labaw sa kinaandan nga pag-ulan sa madamo nga bahin sang pungsod sa katapusan nga quarter sang tuig, kag masami nga nagapadayon sa una nga mga bulan sang masunod nga tuig.
Ang La Niña masami nga may kaangtanan sa pagdamo sang mga bagyo, mabaskog nga pag-ulan, kag pagtaas sang lebel sang tubig sa mga suba kag alagyan sang tubig.
Ginapanugyan sang PAGASA sa publiko kag lokal nga gobyerno nga magpreparar sa posible nga mga kalamidad, magsunod sa mga advisories, kag magbantay sang kondisyon sang panahon agud malikawan ang kahalitan.
