MANILA-Nagpaandam ang Philippine Atmospheric, Geophysical and Astronomical Services Administration (PAGASA) nga dose ka lugar sa nagkalain-lain nga bahin sang Pilipinas, lakip ang probinsya sang Capiz, ang posible makabatyag sang drought ukon malawig nga kakulang sang ulan sa katapusan sang Nobyembre 2026.
Suno sa PAGASA, nagalakip sa mga lugar nga posible maapektuhan ang Albay, Camarines Norte, Camarines Sur, Catanduanes, Capiz, Negros Oriental, Leyte lakip ang Tacloban City, Samar, Siquijor, Southern Leyte, City of Isabela sa Basilan, kag Misamis Oriental lakip ang Cagayan de Oro City.
Bukod diri, 57 ka lugar ang posible makaeksperyensya sang dry spell, samtang 11 ka lugar naman ang mahimo makabatyag sang dry condition antes matapos ang amo nga bulan.
Ginpahayag sang ahensya nga ginakabig nga drought ang kahimtangan kon ang kadamuon sang ulan naganubo sang sobra 60 porsyento ukon way below normal sa sulod sang tatlo ka sunod-sunod nga bulan, ukon naganubo sang 20 porsyento ukon labaw pa sa sulod sang lima ka sunod-sunod nga bulan. Ang dry spell naman nagakahulugan sang mas manubo sa normal nga pag-ulan sa sulod sang tatlo ka sunod-sunod nga bulan, samtang dry condition kon duha ka sunod-sunod nga bulan nga manubo sa normal ang pag-ulan.
Para sa bulan sang Nobyembre, ginapaabot ang mas manubo pa gid sa normal nga pag-ulan sa Metro Manila, Northern Luzon, Marinduque, Romblon, Mindoro kag pila ka bahin sang Central Luzon, CALABARZON, Bicol Region kag Palawan. Samtang, ang kalabanan nga bahin sang Southern Luzon, Visayas kag Mindanao posible man makabatyag sang manubo sa normal nga kadamuon sang ulan.
May kaangtanan sa temperatura, mahimo maglab-ot sa 38 degrees Celsius ang kainit sa mga patag nga lugar sang Mindanao, samtang posible magsaka sa sobra 37 degrees Celsius sa mga patag sang Northern kag Central Luzon. Sa pihak sini, posible man magnubo sa 13 degrees Celsius ang temperatura sa kabukiran sang Cordillera kag magnubo sa 15 degrees Celsius sa mga bukidnon nga bahin sang Mindanao.
Samtang, ginapaabot man sang PAGASA nga isa tubtob duha ka tropical cyclones ang mahimo magsulod sa Philippine Area of Responsibility ukon PAR sa sulod sang Nobyembre.
Apang, bangud sa nagapadayon nga El Niño, mas nagahimo sang bagyo sa mas malayo nga bahin halin sa Pilipinas, gani mas manubo ang posibilidad nga mag-landfall ini sa pungsod. Bisan pa sini, ginapaandam nga kon may bagyo nga mag-landfall, mahimo ini mangin makahalalit bangud posible mag-abot sa typhoon ukon super typhoon intensity samtang nagalabay sa mainit nga katubigan.
Suno sa pinakabag-o nga advisory sang PAGASA, nagapabilin ang strong tubtob very strong El Niño sa tropical Pacific Ocean. Ginapaabot nga mag-abot ini sa pinakamataas nga lebel sa Disyembre 2026 kag posible magpadayon tubtob sa ikaduha nga quarter sang 2027.
Bangud sini, ginapanawagan ang mga pumuluyo, ilabi na ang mga mangunguma kag mga komunidad nga nagasalig sa ulan para sa ila pangabuhian, nga mangin handa sa posible nga epekto sang malawig nga kakulang sang ulan, lakip ang pagnubo sang suplay sang tubig kag posible nga halit sa mga pananom.
