ROXAS CITY-Ginpatpat sang pamunuan sang Philippine Atmospheric, Geophysical and Astronomical Services Administration (PAGASA) Capiz ang mga kinahanglan nga ubrahon agud malikawan nga maigo sang kilat.
Sa interview sang Bombo Radyo sa kay Mrs. Imelda Ofalla, Chief Meteorologist Officer sang PAGASA Capiz nga likawan nga magtinir sa guha sang balay sa tion nga may yara sang pagpangilat sa kalangitan.
Suno sa kay Ofalla nga kun matabuan nga yara sa guha sang panimalay samtang nagapangilat, guilayon nga magsulod sa panimalay.
Likawan nga magpanilong sa mga matag-as nga puno sang kahoy, sa poste kag sa mga matag-as nga lugar.
Gindugang pa sini nga likawan man nga magtinir sa tubig samtang nagapangilat bangud gina-abat man ini sang kilat.
Samtang, kun yara naman sa sulod sang panimalay samtang nagapangilat, likawan nga mag-usar sang cellphone, huslu-on ang mga kagamitan nga nakasaksak sa kuryente.
Likawan man nga magkapot sang mga bagay nga human sa metal bangud gina-abat man ini sang kilat.
Ginkompirmar man ni Ofalla nga masami man nga gina-igo sang kilat ang mga espiyo rasun nga kinahanglan man ini nga takpan.
Matandaan nga duha na ang napagkit nga napatay sa probinsiya matapos nga gin-igo sang kilat.
