Nagpanawagan ang Philippine Atmospheric, Geophysical, and Astronomical Services Administration (PAGASA) sa publiko nga yara sa Luzon kag Visayas nga maghanda sa ginlaragway sini nga “very intense” kag “enormous” tropical cyclone Fung-wong nga isa na ka severe tropical storm sa guwa sang Philippine Area of Responsibility (PAR).
Mas nagbaskog pa ang Fung-wong sa guwa sang PAR nga may kabaskugon sang hangin nga nagalab-ot sa 95 km/h tubtob 100 km/h.
Samtang ang pagmadlos naman ang nagalab-ot sa 125 km/h nagikan sa 115 km/h sandig sa ‘las 11 sang aga nga weather bulletin.
Ulihe nga nakit-an ang Fung-wong sa 1,315 kilometers east sang Eastern Visayas as of 10am.
Base sa kadasigon sini, ang Fung-wong ang ginalantaw nga magasulod sa PAR karon sa gab-i ukon bwas sa aga, Nobyembre 8.
Ini ang pagatawgon nga Uwan.
Sa tion nga magsulod ini sa PAR, posible nga isa na ini ka bagyo.
Ginalauman sang PAGASA nga gilayon nga magbaskog ang tropical cyclone kag posible nga maglab-ot sa typhoon status kag mangin super typhoon sa Sabado sang gab-i ukon sa Domingo sang aga, Nobyembre 9.
Ginpahayag man sang weather bureau base sa latest forecast nga ang potential landfall sites sang Uwan ang posible yara sa southern portion sang Isabela ukon northern portion sang Aurora.
Ang pag-landfall sini ang ginalantaw sa Domingo sang gab-i ukon sa Lunes sang aga, Nobyembre 10.
Pagkatapos nga mag-landfall, magalabay ini sa Northern Luzon padulong sa West Philippine Sea sa Lunes sang aga ukon sa hapon.
(Photo from Rappler)
