Nagpasaka subong nga adlaw sang petisyon sa Korte Suprema ang isa ka abogado parte sa ‘voting threshold’ ukon kadamuon sang boto nga kinahanglan para sa desisyon sang Senate Impeachment Court.
Suno kay Atty. Ernesto Francisco Jr., nagpasaka siya sang ‘petition for certiorari and prohibition’ agod kwestyunon ang ginpatigayon nga pagtalakay sang Senado bag-o lang.
Ginkwestyon niya ang desisyon ukon paghangop sang Senate Impeachment Court parte sa pagbag-o sang kadamuon sang boto nga kinahanglan para maconvict ang isa ka akusado.
Ginpahayag man niya nga nagpasaka siya sang petisyon bilang isa ka ordinaryo nga pumuluyo kag wala ini sang koneksyon sa bisan ano nga partido.
Nagapati si Atty. Francisco Jr. nga ang Korte Suprema ang may katungdanan sa paghatag sang husto nga paghangop sa mga probisyon sang Saligang Batas.
Suno sa iya, delikado ang amo nga sitwasyon kon ang mga opisyal sang gobyerno ukon mga Senador mismo ang magdesisyon kon paano pagahangpon ang isa ka probisyon sang layi.
Bangod sini, ginapangabay sang nagpasaka sang petisyon nga magpagwa ang korte sang ‘Status Quo Ante Order’ agod mabalik ang sitwasyon antes nagluntad ang kontrobersiya.
Wala niya ginpangayo ang ‘Temporary Restraining Order’ bangod ang Legislative kag Judiciary pareho nga mga sanga sang gobyerno nga may ila tagsa ka gahum.
Ginapangabay sang abogado nga ipawalang-bisa ukon ideklarar nga wala sang bisa ang pagtalakay kag desisyon sang Senado nga ginpatigayon sang Septiyembre 23.
