Nagapati ang Kabataan Party-list Panay nga ang pagbag-o sang liderato sa Senado kag ang pagpatawag sang special session sang Kongreso isa ka patimaan sang padayon nga krisis sa idalom sang administrasyon ni President Ferdinand Marcos Jr.
Sa interview sang Bombo Radyo kay Arlie Bosque, Secretary General sang Kabataan Party-list Panay, iya ginpahayag nga makita sa mga nagakalatabo sa Senado ang nagalala nga indi pag-intindihanay sang Majority kag Minority Bloc.
Suno kay Bosque, posible nga may kaangtanan ang pagpili kay Senador Sherwin Gatchalian bilang bag-o nga Senate President sa nagahilapit nga pagbukas sang impeachment trial ni Vice President Sara Duterte.
Ginpunto man ni Bosque, nga makapila na ka beses nga nagbag-o ang liderato sa Senado sa idalom sang sini nga administrasyon ang nagapakita sang padayon nga mga isyu sa sulod sang gobyerno.
Dugang pa sini, mas kinahanglan nga pagatutukan sang mga lider sang pungsod ang mga problema nga ginapangatubang sang mga Pilipino.
