ROXAS CITY, CAPIZ- Ginpatpat sang isa ka legal consultant ang mga peligro sa pagbakal sang propedad—balay man ukon duta sa barato nga presyo.
Sa interview sang Bombo Radyo kay Atty. Matthew Francisco Espiritu sang Integrated Bar of the Philippines -Capiz Chapter, iya ginpahayag nga may yara sang mga peligro kag masami mga sala sa pagbakal sang isa ka propedad sa barato nga presyo.
Suno kay Atty. Espiritu, pila sa mga masami nga sala amo ang mga masunod:
- Nagasako sa pagbaligya ang seller subong man nagasako sa pagbakal ang buyer,
- Wala gin-usisa sang maid-id sang buyer ang mga dokumento kag papeles sang propedad kaangay sang titulo kag iban pa,
- Ginbakal ang propedad sa isa ka broker ukon ahente, sa diin kun kaisa, nagakapornada ang transaction,
- Ang transaction natabo lang pamaagi sa verbal agreement sa diin nga wala sang mga kasulatan, kag
- Preparado nga magbayad si buyer si seller sang propedad apang wala ginpanundom ang mga taxes sang isa ka propedad.
Ini lamang ang pila ka mga sala nga pamaagi sa pagbakal sang propedad nga ginpakigbahin sang abogado sa diin nga suno sa iya, may dala nga peligro.
Pahayag niya, mahimo nga pornada ukon magkadto sa wala ang isa ka transaction kun sa diin dako nga malugi amo ang buyer kun indi mag-agi sa insakto nga proseso.
Nahibaluan nga ang “steal price” ukon ang barato nga presyo sang propedad, nagakatabo kun masami may problema na ini kaangay sang prendado, ginaawayan ukon may problema sa mga dokumento.
Nagpanugyan naman ang natungdan nga magpakig-angut gid sa mga legal consultants antes nga magbakal sang propedad agud masiguro ang kaluwasan kag transparency sang transaksyon.
Interviewed by Bombo Roadnie Daban Dalanon
