Ginsuguran na ang pagbalhin sang mga paradahan sang tricycle kag jeep sa Riverside nga bahin sang Teodoro Arcenas Trade Center (TATC) sa Roxas City, bilang kabahin sang plano sang city government nga mapahapos ang dalagan sang trapiko sa lugar.
Sa interview sang Bombo Radyo kay Punong Barangay Castor Holce Bialen Punong Brgy sang Barangay VIII, iya ginpahayag nga katuyuan sang pagbalhin nga mapalapad ang alagyan, maplastar sAng maayo ang mga paradahan sang pampubliko nga salakyan kag malikawan ang traffic congestion sa palibot sang TATC.
Suno kay Bialen, indi pagpauntat sang pangabuhian sang mga tricycle driver ang tuyo sang pagbalhin, kundi pag-organisar lamang sang ila paradahan agud indi sila makabalabag sa dalan.
Pahayag pa niya, positibo man ang reaksyon sang pila ka tricycle driver nga nakaestorya niya, bangud suno sa mga ini, mas matawhay kag mas organisado ang ila bag-o nga paradahan sa Riverside.
Dugang pa sang natungdan, wala pa sang pinal nga pagsulundan sa paggamit sang bag-o nga paradahan kag posible nga may pagsinapol pa sa mga presidente sang transport groups agud mapat-od ang nagakaigo nga sistema sa pagamit sini.
