Nagpakita sang positibo nga epekto sa dalagan sang trapiko ang pagbalhin sang paradahan sang mga tricycle sa Teodoro Arcenas Trade Center (TATC).
Sa interview sang Bombo Radyo kay Mr. Roger Singalivo, Presidente sang Tricycle Operators Drivers Association-Dinginan, iya ginpahayag nga nagaugyon ang kadam-an nga mga driver sa pagbalhin sang ila paradahan bangod nakita nila nga makabulig ini sa pagpaayo sang sitwasyon sang trapiko sa ila anay terminal.
Suno kay Singalivo, mas mahapos na para sa ila ang pagbiyahe sa bag-o nga paradahan bangod diretso na sila makaguwa, indi kaangay sang una nga kinahanglan pa nila maglibot sa sulod sang TATC nga masami nagakaeksperyensya sang guot sa trapiko bangod sa kadamuon sang mga salakyan.
Pahayag pa niya, wala man sang daku nga pagbag-o sa ila palangabuhian, apang may gamay nga epekto sa kadamuon sang ila pasahero bangod wala pa naanad ang pila ka commuter sa bag-o nga lokasyon sang terminal.
Dugang pa sang natungdan, antes ang pagbalhin ginpahibalo na sila sang City Government kag ginpakita man sa ila ang bag-o nga lugar nga pagaplastaran sang tagsa nila ka tricycle.
