ROXAS CITY – Bagsak presyo na ang mga negosyante sa pagbaligya sang ila mga bulak sa Balay Kapisnon kasunod sang temporaryo nga pagpasarado sa tanan nga mga patyo sa pungsod kadungan sang nagahilapit nga adlaw sang tigkalalag ukon pista minatay 2020.
Sa interview sang Bombo Radyo kay Manang Marly, negosyante sang bulak nga mas ginpakamaayo na lamang nila nga ibaligya ang bulak sa barato nga presyo agud nga indi man sila maperdi kag mabalik lamang ang ila kapital.
Ini bangud sa Oktubre 29 temporaryo anay nga pagadumilian ang pagpadulong sa tanan nga mga patyo bilang paghalong man batuk sa Coronavirus Disease ukon COVID-19 pandemic.
Ginpahayag sini nga subong pa lamang amat-amat na nagapadulong kag nagabakal ang pila ka mga customer sang ila ginabaligya nga bulak.
Aminado man si Manang Marlyn nga tuman kalayo ang deperensya sang ila pagbaligyaanay subong nga tuig kun ikumparar sang tinalikdan nga tuig 2019 sang wala pa ang pandemya sa pungsod.
Samtang, ginpahayag naman sang isa ka bumalakal sang bulak nga subong pa lamamg nagabakal na sila sang bulak agud nga makabisita sa ila mga himata nga nagtaliwan na antes pa man dumilian ang pagpadulong sa mga patyo.
