Nangin madinalag-on ang pagbaligya sang P20 per kilo nga bugas sang provincial government para sa vulnerable sector.
Sa interview sang Bombo Radyo kay Mr. Raoul Perez, Acting Provincial Agriculturist sang Office of Provincial Agricuilturist- Capiz, iya ginpahayag nga yara sa kapin 1,500 ka mga benepisyaryo lakip na ang mga Senior Citizen, Persons with Disability (PWD), tricycle driver kag iban pa nga mga sector.
Suno kay Perez, wala sang pinili-an ang pagbaligya sang bugas kun sa diin yara lang sa maximum of 10 kilos kada tawo ang mahimo baklon.
Pahayag pa niya, maayo nga klase sang bugas ang ginbaligya bangud ginsigurado nga bag-o ani ang ginbakal sa National Food Authority agud masiguro ang kalidad sa mga manugbakal.
Nagalaum man ang natungdan nga magapadayon pa ang nasambit nga programa sa masunod nga tuig agud mas madamo pa nga mga pumuluyo nga parte sang nagkalain-lain nga sector ang mahatagan sang kahigayunan nga makabakal sang bugas sa manubo nga presyo.
