ROXAS CITY – Ginadumilian na ang pagbaligya sang panginhason sa Teodoro Arcenas Trade Center matapos nga nagpositibo sa red tide ukon may yara sang presensya sang organismo nga Pyrodinium Bahamense ang 4 sa 10 ka mga shellfish meat sample nagikan sa nagkalain-lain nga kalalawran nga sakup sang probinsya sang Capiz.
Ini ang ginkumpirmar ni Mrs. Heloise Mendoza, administrador sang TATC sang mainterview sang Bombo Radyo.
Ginsiling sini nga nagpapanaug na sang direktiba si Mayor Ronnie Dadivas nga nagamandu nga ginadumilian na ang pagbaligya, pagkaon kag pagkuha sang panginhason sa kalalawran sang syudad ilabi na sa kalalawan sang Barangay Barra.
Gilayon naman nga ginpahibalo sang administrador ang Fish Vendors Association nga untaton na ang pagbaligya sang panginhason apisar wala pa ini nagikan sa lugar nga indi positibo sa red tide.
Panugyan naman ni Mendoza sa mga vendors nga apektado nga mangita danay sang iban nga produkto nga mahimo nila pagkitaan kaangay sang pagbaligya sang isda agud indi ma-unsami ang ila pangabuhian.
Nagapangabay naman ang administrador nga makig-kooperar ang mga vendors sa nasamit nga direktiba bangud para ini sa ikaayong lawas kag malikawan ang mangin epekto sini sa tawo.
Matandaan nga nagpositibo ang meat samples sang duha ka area sa Brgy Natividad banwa sang Pilar, Brgy. Butacal, Panay, kag Brgy. Barra, Roxas City.
