ROXAS CITY – Mas pasangkaron pa sang mga opisyal ilabi na sang mga tanod sang Barangay Baybay ang pagbantay kag pagpatrolya sa ila komunidad sini nga gab-i agud masiguro ang seguridad sang pumuluyo kag iban pa sa ila lugar.
Ini ang ginpahayag ni Punong Barangay Rey Magallanes, Kapitan sang Brgy. Baybay, matapos ang asod-asod nga pagpanghold-up nga nagluntad sa ila barangay sang martes sang gab-i.
Suno diri, wala pa sila sang may matumod nga suspek ukon person of interest bangud padayon pa sa karon ang pagvalidate sa mga panghulagon sang mga persona nga may history sang pagpanghold-up.
Dugang sini, ginakasubo niya nga may yara sa gihapon sang mga krimen nga gakahinabo sa ila lugar apisar wala man ini nagauntat sang pagtrabaho agud malikawan ang amu nga insidente.
Ginpahayag sang Punong Barangay, apisar ano pa nga pagbantay sang mga katapo sang kapulisan kag sang iya mga tanod, ginapatihan sini ginahulat lamang sang mga kriminal ang tyempo nga matapos ang pagpatrolya sang mga ini antes maghimo sang malain nga tinutuyo.
Ginapanugyan ni kapitan Magallanes nga magkooperar kag magpartisipar ang mga pumuluyo agud nga malikawan nga mangin biktima sang pagpanghold-up kag iban pa nga mga krimen.
