Wala nauyunan ni Board Member Eleuper ‘’Bulilit’’ Martinez ang pagbasol sang alkalde sang Mambusao sa hepe sang Provincial Engineer’s Office sa nangin kapabayaan sang contractor sa proyekto nga road rehabilitation sa Poblacion Ilaya, Pontevedra, Capiz.
Ginpahayag ni BM Martinez nga respeto na gid lamang kuntani kay Engr. Edgar Agana bangud yara sila pareho sa administrasyon.
Mahimo man nga mapaagi ni Mayor Labao ang iya opinyon batuk kay Engr. Agana sa proper channel kag indi kinahanglan nga ipaagi sa kahanginan.
Suno sa opisyal nga wala man sini nagustuhan ang pagbaya sang contractor sa proyekto sang gobyerno bangud naghatag ini sang dugang nga huol sa mga pumuluyo.
Luyag man sang Sangguniang Panlalawigan nga ma-imbestigahan ang natabo sa diin indi basta na lamang nga talikdan sang contractor ang ila obligasyon kag responsibilidad.
Nahibaluan may ginpapasar nga resolution ang provincial board nga tuyo ma-imbestigahan ang insedente kag mahimo nila nga ipatawag ang miyembro sang Bids and Awards Committee (BAC) para makapaathag.
Bangud sa ginhimo sang contractor mahimo nga kumpiskahon ang performance bond kag mangin blacklisted ini sa tanan nga bidding sang mga proyekto sang gobyerno sa Capiz.
