Nagapati ang isa ka anay kongresista nga isa ka importante nga kadalag-an para sa mga biktima sang extrajudicial killings ang desisyon sang International Criminal Court (ICC) matapos ginbasura ang apat ka ground sang pagtutol sa hurisdiksyon may kaangtanan sa kaso batok kay former President Rodrigo Duterte.
Sa interview sang Bombo Radyo Kabataan Partylist Representative Raoul Manuel, klaro nga samtang may nga reklamo kag basehan, nagapadayon ang gahum sang ICC sa pagpadayon sang proseso.
Para sa iya, pamatuod ini nga insakto ang panindugan sang international court sa pagpadayon sang kaso.
Suno kay Manuel, isa ini ka maayo nga balita para sa mga biktima bangod nagahatag ini sang senyales nga mahimo na magsugod ang aktuwal nga paglilitis batok sa anay pangulo, bisan pa nga mahimo ini maglawig nga proseso.
Pahayag pa niya, mas mayo man kun magbalik ang Pilipinas bilang miyembro sang ICC agud mapabaskog pa ang mekanismo sang pagpanabat sa hustisya, ilabi na para sa mga biktima sang mabug-at nga krimen.
Dugang pa sang natungdan, ini ang nagaserbe nga pahanumdom nga ang hustisya dapat ginapatuman bisan pa sa pinakamataas nga opisyales sang pungsod.
