Nagapati ang isa ka abogado nga posible makaapekto sa pagsalig sang publiko sa mga institusyon sang gobyerno ang pagbasura sang Office of the Ombudsman sa mga reklamo nga plunder, graft kag malversation batok kay Executive Secretary Ralph Recto kag anay Philippine Health Insurance Corporation (PhilHealth) President kag Chief Executive Officer Emmanuel Ledesma bangud sa kakulangan sang ebidensiya.
Sa interview sang Bombo Radyo kay Atty. Rodel Taton, Dean sang Graduate School of Law sang San Sebastian College–Recoletos sa Manila, iya ginpahayag nga wala pa sila makabaton sang kopya sang resolusyon nga nagabasura sang kaso batok sa duha ka mga opisyal.
Suno kay Taton, ang mga alegasyon sang korapsyon kag ang kakulangan sang impormasyon parte sa desisyon mahimo magpaluya sang pagsalig sang publiko sa gobyerno.
Dugang pa sini nga importante ang klaro kag bukas sa publiko nga mga proseso kag desisyon sang mga institusyon agud masiguro ang transparency kag accountability sa pagserbisyo sang gobyerno.
