ROXAS CITY – Ginadayaw ni Capiz 1st district congressman Emmanuel ‘Tawi’ Billones Sr. ang kaisog ni Bise-Presidente Leni Robredo sa ginatanyag ni Presidente Rodrigo Duterte nga mangin co-chairperson ini sang Inter-Agency Committee on Anti-Illegal Drugs (ICAD).
Sa exclusive interview sang Bombo Radyo, ginpahayag ni Billones nga dalayawon ang kaisog ni Robredo bangud ginbaton niya ang amo nga posisyon sa pihak sang paandam sa iya sang mga kaalyado sini sa Partid Liberal nga indi pagpatulan ang ginapahayag ‘trap’ sang presidente.
Apang suno kay Billones bangud sang katuyuan ni Robredo nga makasalbar sang kabuhi, ginpili sini batunon ang ginatanyag sa iya.
Ginpahayag ni Billones nga para sa iya luyag sang bise-presidente nga salbaron sa kamatayon ang mga biktima sang ginapahayag maduguon nga kampanya kontra sa ilegal nga droga sang gobyerno.
Nagapati man ini sa sinseridad sang bise-presidente sa nasambit nga kampanya agud dalayon na nga matapna ang ilegal nga droga sa pungsod.
Apang kun si Billones lamang ang pamangkuton, ginpahayag sang opisyal nga kun siya ang yara sa posisyon sang bise-presidente, indi sini pagbatunon ang ginatanyag sang presidente.
Matandaan nga ginbaton na ni Robredo ang ginatanyag ni Duterte nga mangin co-chairperson sang ICAD.
Gin-aku man sini nga madamo siya sang nabaton nga paandam angut sa ‘trap’ nga ginatanyag sang presidente apang iya ini nga ginbalewala.
Panindugan ni Robredo nga tampad ini nga nagaupos sa kampanya sang gobyerno agud dalayon na nga matapna ang illegal drug trade sa Pilipinas.
