Makabig nga importante nga okasyon kag seremonya ang patigayunon nga pormal nga pagbaton ni Cardinal Jose Advincula Jr., sang iya nga ‘’red hat’’ ukon bestowal of insignia sa Immacualte Concepcion Metropolitan Cathedral sa maabot nga Biyernes Hunyo 18, 2021.
Ginpahayag ni Reverend Jose Arturo Emilio Arbatin, spokesperson sang Archdiocese of Capiz nga isa ini ka maragtason nga hitabo sa historya sang Simbahan Katolika sa Pilipinas bangud sa pinakauna nga tinion diri sa Pilipinas partikular sa Archdiocese of Capiz igahatag ang red hat sa Capizeño nga cardinal.
Ika-siyam nga Filipino Cardinal si Cardinal Advincula sa diin walo sa nasambit nga mga Filipino Cardinal ang nagbaton sang ila red hat sa Roma, direkta sa Santo Papa.
Apang bangud may yara sang pandemya, wala nakapadulong sa Roma si Cardinal Advincula sang Nobyembre sang nagligad nga tuig para batunon ang insignia.
Bangud diri magapadulong sa probinsiya si Papal Nuncio Archbishop Charles Brown, agud pangunahan ang seremonya sa Immaculate Conception Metropolitan Cathedral alas 3 sa hapon Biyernes nga adlaw.
Ginklaro ni Rev. Father Arbatin nga limitado lamang ang makatambong sa nasambit nga seremonya bilang pagsunod sa minimum health protocols.
Kalakip sa makasulod sa simbahan ang mga pari, madre kag immediate family ni Cardinal Advincula
Apang mahimo sa gihapon maka-witness sa nagakahinabo nga seremonya sa sulod sang simbahan pinaagi sa FB live streaming sang Capiz archdiocese.
Samtang matapos ang seremonya kay Cardinal Advincula magapadulong si Papal Nuncio Charles Brown sa Sta. Monica Parish Church sa banwa sang Panay sa diin siya mismo ang maga-officiate sa nasambit nga misa.
Matandaan nga ginpili ni Pope Francis si Advincula nga mangin masunod nga arsobispo sang Manila Archdiocese tal-us ni Cardinal Luis Antonio Tagle.
