ROXAS CITY – “Indi nyo ko dapat pagbasulon bangud bal-an nyo ang batasan sang inyo bata, ano klase kun mahubog”.
Ini ang ginpahayag ni Pinky, asawa ni Oliver Casador, suspek sa pagsunog sang kaugalingon nga balay kag duha pa ka mga puluy-an sa Barangay Cogon, syudad sang Roxas.
Sa pakig-angut sang Bombo Radyo kay Pinky, ginpahayag sini nga ang iya pagpadulong sa binayle sa Sitio Culasi, Barangay Lonoy banwa sang Sapian ang may permiso nagikan sa iya bana kag nahibaluan man ni Oliver nga magadugay siya sang duha ka adlaw agud magpaliwa-liwa sa mga ulubrahon sa ila balay.
Apang, ginkakibot na lamang sini ang pagtawag sang iya bayaw nga ginsunog na sang iya bana ang ila balay kag ginabasol pa siya sang iya ugangan bangud sa natabo.
Suno kay Pinky, indi siya dapat pagbasulon sang iya ugangan bangud saksi man sila kun ano klase nga tawo si Oliver kun mahubog.
Aminado man si Pinky nga masami sila mag-away sang bana kag gilayon man nga naga-ayuhay apang wala siya nagalaum nga mahimo sang iya bana nga sunugon ang balay bangud lamang wala ini nakapuli kag sa pagpangimon.
Dugang sini, palangga niya ang iya partner kag mahimo niya ini mapatawad apang desidido naman ini nga makipagbulugay kay Oliver kag buhi-on sang naga-isahanon ang iya mga kabataan.
