ROXAS CITY – Wala sang malain nga nakita si Dr. Edwin Monares sa pagbisita ni Capiz 2nd District Congressman Fredinil Castro sa mga opisyal sang gobyerno sa kabanwahanan.
Ini ang ginpa-athag sang provincial administrator agud tadlungon ang naglapta nga report nga ginakabig pamahog sang Contreras administration ang ginahimo nga pagbisita sang kongresista sa mga lugar sa premier distrito.
Suno kay Monares nga normal lamang para sa bisan sin-o nga mataas nga opisyal sang gobyerno nga magbisita kag magpakigkita sa pila ka mga lideres agud makahinun-anon sa nagakahinabo sa ila lugar.
Ginpahayag ni Monares nga wala sang rason para matublag ang gobernador, bangud kampante ini nga maayo nga serbisyo ang iya ginahatag sa mga pumuluyo.
Sa pagkamatood suno sa opisyal nga isa ka welcome development ang pagbisita ni Castro sa kabanwahanan bangud pagpakita ini nga ginahimo sang kongresista ang obligasyon bilang opisyal sang gobyerno.
Samtang sa isyu naman sang troll ukon peke nga FB account nga ginagamit sa pagpapakamalut sa kongresista, suno kay Monares nga indi lamang si Congressman Castro ang nabiktima sini, bangud siya mismo ang nakabaton man sang mga pagpakamalaut gikan sa wala makilala nga indibidwal.
Apang ginapanindugan sini nga wala naghalin sa kapitolyo probinsiyal ang ginaalegar troll nga nagabuhi sang negatibo nga komento kay Congressman Castro, bangud sa iya mismo talatapan wala sang signal.
