ROXAS CITY – Wala sang pamulitika ang pagpadulong nanday Presidential aspirant kag anay senador Ferdinand ‘Bongbong’ Marcos, Jr. kag ka-tandem sini nga si Vice presidential kag Davao City Mayor Sara Duterte-Carpio sa probinsya sang Capiz.
Ini ang ginpahayag ni Provincial Administrator Edwin Chinel Monares, sang mainterview sang Bombo Radyo.Suno diri, nagtawag gid lang ang BBM-SARA uniteam kay Capiz Governor Esteban Evan Contreras, kag nagpabutyag nga luyag nila maghatag sang donasyon sa mga naapektuhan sang Bagyo Odette sa probinsya.
Dugang pa ni Monares nga apisar indi tuman ka grabe ang nangin halit sang bagyo sa probinsya, gilayon man nga gin-akomodar sang gobernador ang hinyo sang BBM-SARA uniteam, bangud man sa ila tinutuyo nga makabulig sa mga Capiznon.
Wala nagdugay ang nangin pag-istoryahanay ni Mayor Duterte-Carpio kag ni Governor Contreras.
Dala sang partido ang sinako nga bugas kag iban pa nga relief goods, may yara man sang ginpalab-ot nga financial assistance para sa mga pumuluyo nga apektado sang nasambit nga bagyo.
Nahibaluan nga wala sang ginhiwat nga caravan sang mga supporters sa duha, bangud ang ila pagpadulong sa Capiz amu ang pagdul-ong gid lamang sang nasambit nga donasyon.
Separado man nga naghugpa sa Roxas City Airport ang private plane sang BBM-SARA.Nauna nga nag-abot mga alas-9 sa aga ang alkalde sang Davao City nga wala sang iban nga pulitiko nga kaupod.
Samtang, si BBM ang sakay sa private plane sang anay Gobernador kag sa karon alkalde sang Ilocos Sur nga si Mayor Chavit Singson, kaupod ang Majority Floor Leader sang House of the Representatives nga si Congressman Martin Romualdez, nga pakaisa ni Marcos.
Ginpasiguro man ni Monares nga makalab-ot sa pumuluyo sang Capiz ang nasambit nga bulig.
