Wala sang major incidents nga natabo sa probinsya sang Capiz sa pagbukas sang klase para sa School Year 2026-2027.
Sa interview sang Bombo Radyo kay Police Major Rachelle Garnica, Public Information Officer sang Capiz Police Provincial Office, iya ginpahayag nga ang ini nga kadalag-an ang kabahin sang pagpatigayon sang Oplan Ligtas Balik-Eskwela 2026.
Suno kay Garnica, wala sang may nabalhag ukon nareport nga ano man nga seryoso nga insidente kag pamahog sa seguridad ukon kinagamo sa bug-os nga probinsya.
Pahayag pa niya, ang matawhay nga pagbukas sang klase ang resulta sang komprehensibo nga security coverage, istrikto nga monitoring kag padayon nga police visibility sa mga eskwelahan, dalan, terminal kag iban pa nga convergence areas.
Dugang pa sang natungdan, magapadayon ang pagmonitor sang mga katapo sang kapulisan agud masiguro ang kaluwasan sang mga estudyante, ginikanan, kag mga manunudlo sa kabug-usan sang school year.
