ROXAS CITY – Ginkumpirma sang gobernador sang probinsiya nga madayon na sa Lunes nga adlaw ang pagbukas sang Malasakit Center sa Roxas Memorial Provincial Hospital (RMPH).
Ginpahayag ni Governor Esteban Evan Contreras II nga ginalauman ang pag-alabutan sang pila ka mga opisyales sang gobyerno sa pagpanguna ni Senator Bong Go nga yara sa likod sang nasambit nga programa nga tuyo mabuligan ang pigado nga mga pumuluyo.
Suno sa opisyal nga sa amo man nga adlaw I-turn over ni Go ang pondo nga gamiton sa isa ka bulan sa diin posible nga madugangan pa ini kun maubos ang pondo tagsa ka bulan.
Aminado si Contreras nga target kuntani sini nga wala sang mabayaran ni singko sentimos ang mga pigado nga pasyente nga ma-ospital agud indi na sila magpanumdum pa sang ila balayaran.
Magadiretso man sa ospital ang tseke nga ginabulig sang malasakit center, agud wala na sang problemahon pa ang mga pasyente.
Ginapanindugan pa sang gobernador nga ang Malasakit Center ang sabat sang gobyerno nasyunal sa ginhinyo sini nga mapalapit ang gobyerno sa mga tawo partikular sa mga pigado nga mga pumuluyo.
