ROXAS CITY, CAPIZ- Ginapanawagan sang Bangon Sambayanan People’s Movement ang pagpanaog sa pwesto ni President Ferdinand Marcos Jr. sa tunga sang madamo nga isyu sang koraspyon sa pungsod Pilipnas.
Sa interview sang Bombo Radyo kay Ka Eric Celiz, Secretary General sang Bangon Sambayanan People’s Movement, iya ginphayag nga magapadayon sila sa pagsinggitan kasubong sang ginahimo sang iban man nga mga grupo.
Suno kay Celiz, bwas nga adlaw sang Dominggo, Nobyembre 30, 2025, patigayunon ang Nationwide Day of Protest ukon ang Trillion Peso March sa diin nga madamo sa ila nga grupo ang magatambong. Ginabulubanta, nga yara sa mas ukon menos 10, 000 ka mga kaupdanan sini ang magapkigbahin sa hublag-protesta.
Magluwas sa pisikal nga rally, magapatigayon man sang virtual pamaagi sa Zoom ang linibo nga mga Overseas Filipino Workers.
Pahayag niya, wala sang iban nga ginatudlo sa subong ang mga gina-imbestigaran nga mga opisyal kundi si President Ferdinand Marcos Jr. nga ginakabig mastermind sa pagpangawat sang kwarta sa kaban.
Ginalauman sang ila nga grupo nga pamatian sang natungdan ang ila nga panawagan kag maathagan ang Arm Forces of the Philippines kag Philippine National Police nga mag-withdraw sang ila nga suporta sa Presidente.
Dugang pa sang natungdan, pananglitan nga indi magpanaog sa pwesto ang Presidente, magapadayon ang ila nga mga hugblag-protesta agud nga makuha ang ginatawag nga hustisya para sa mga pumuluyo sang pungsod.
Interviewed by Bombo Sunnie Mae Constantino Batencila
