Naghinay ang pag-uswag sang ekonomiya sang Pilipinas sa ginabanta nga 5.2 % sa ikatlo nga quarter sang 2025, suno sa University of Asia and the Pacific (UA&P).
Ang pagnubo ginatunaan sang negatibo nga epekto sang korapsyon sa mga flood control projects kag serye sang mga bagyo, nga nagpaluya sang pagsalig sang mga konsumidor.
Mas manubo ini sangsa 5.5% growth sa ikaduha nga quarter, kag sa sulod sang mas manubo nga punta sang target sang gobyerno. Apang, ang UA&P nagapaabot nga ang pagdabong magalab-ot sa 5.7% sa ikaapat nga quarter bangod sang mas mabaskog nga mga remittances kag amat-amat nga pagbangon sang ekonomiya.
Sa pihak sang 19% nga taripa sang US, nagapabilin nga mabaskog ang export growth sang Agosto. Nagtaas man ang total employment sa 50.1 million, nga nagtuga sa pagnubo sang unemployment rate sa 3.9%.
Samtang, ang inflation nagapabilin nga manubo sa 1.7%, kag ginalauman nga makabulig ini sa pagbangon sang ekonomiya sa nabilin nga bahin sang tuig.
