Pagdagsa sang mga turista sa Capiz bangud sa pagpasarado sa Boracay, ginapreparahan sang tourism office sang probinsiya

ROXAS CITY – Handa ang probinsiya sang Capiz sa pagbaton sang mga turista nga magadagsa kasunod sang pagpasarado sa Isla sang Boracay sa masunod nga mga inadlaw.
Sa interview sang Bombo Radyo Roxas kay Mr. Alphonsus Tesoro, Commissioner for Cultural Communities and Traditional Arts ng National Commission for Culture and the Arts (NCCA) kag hepe sang provincial Tourism and Cultural Affairs Office (PTCAO), ginpahayag sini nga ginalauman na ang pagdivert sa iban nga tourist destination sang mga turista bangud sa temporaryo nga pagpasarado sa Boracay.
Apang antes pa man ang Boracay closure issue ginapadulungan na ang mga tourist spots sa Capiz, mangin ang saboroso nga mga pakinhason ukon seafoods.
Kalakip sa mga atraksyon nga mapabugal sang probinsiya nga sigurado magustuhan sang mga turista amo ang matinlo nga baybay, water falls nga makita sa pila ka munisipalidad, kweba nga may historical background kag pila ka religious site sa diin makita ang mala higante nga imahen sang mga santos.
Suno pa kay Tesoro nga handa man ang maayo nga akomodasyon sang mga hotels sa syudad sang Roxas mangin sa transport group nga magadala sa mga turista sa mga tourist destination.
Samtang makaangkon sang dry run sa bulan sang Mayo ang cruise tourism sa diin magadungka sa Roxas City ang cruise ship nga may sakay nga mga turista.