ROXAS CITY – Ginsuguran na sang City Engineering Office ang pagdeclog sa mga drainage sa kabaranggayan sa syudad sang Roxas nga nagasuprer sang pagbaha sa tagsa ka magbubo ang ulan.
Ginpahayag ni City Councilor Midelo Ocampo nga natukiban sa pagdeclog sa isa ka drainage sa Barangay Tiza nga may porsyon nga puno na sang basura kag bun-on sa diin ini ang rason nga wala nagailig ang tubig kag naga-awas sa mga karsada.
Indi lamang ang Barangay Tiza ang nagaproblema bangud may iban pa nga mga barangay sa syudad ang nagpangayo na sang bulig agud madeclog ang drainage.
Nagpasalig man si Ocampo sa mga pumuluyo nga nagatinguha ang gobyerno sang syudad nga masolusyunan ang problema sa drainage agud mauntat ang pagbaha baha sa ila lugar.
Naghinyo lamang sang kooperasyon si Ocampo sa mga pumuluyo bangud kinahanglan ang pagbinuligay sang tanan agud masolusyunan ang problema sa pagbaha.
Nagpangabay man ang opisyal sa mga pumuluyo kun may makita nga pagbinaha baha sa lugar kun mahimo nga ipalab-ot ini sa City Engineer’s Office nga amo naman ang magapalab-ot sa alkalde agud maaksyunan ang problema.
Nahibaluan nga nagpa-in sang pondo ang gobyerno agud masulusyunan ang madugay na nga problema sa pagbaha baha sa syudad.
