ROXAS CITY – Nagpalab-ut sang reklamo sa Bombo Radyo ang duha ka mga inmates matapos nga nag-alegar nga gindiskartehan sang isa ka empleyado ang ila mga asawa sa Capiz Rehabilitation Center (CRC).
Suno sa interview sang Bombo Radyo kay Alyas Toto, isa ka inmate sang amo nga pasilidad,ginpahayag sini nga ginsaylo ini sq CRC sang tinalikdan nga tuig 2016 kun sa diin Jail Guard pa sadto ang ginareklamo nga si Andrew Llaver nga sa karun nagaserbe na nga Administrative Officer sang amo nga pasilidad.
Suno kay Alyas toto nga nagabisita pa sa iya ang iya nga asawa apang nagakasubo ini sa karun bangud magaduha na katuig nga wala na ini nakapalapit sa nasambit nga presuhan.
Ginkakibot na gid lamang ni Alyas toto nga may yara sang nakasugid sa iya nga mga inmates nga may yara sang ginaalegar relasyon ang iya asawa kag si Llaver nga masami nakikita nga naga-upod sa guha sang pasilidad.
May yara man sang alegasyon nga nakalab-ut sa iya nga nagabusong ang iya nga asawa kag ang ginatudlo nga amay amo si Llaver.
Apang sa pihak sini, wala sa gihapon nagapati si Alyas toto bangud lunsay mga alegasyon pa gid lamang ang nakalab-ut sa iya.
Aminado si Alyas toto nga matunog na ang pangalan ni Llaver sa iya sini nga pagdiskarte sa mga asawa sang mga inmates sa amo nga pasilidad.
Samtang ginkompirmar man sang isa ka inmates nga matuod ang alegasyon natuhoy sa pagdiskarte ni Llaver sa mga asawa sang mga inmates sang Capiz Rehabilitation Center.
Ginpahayag ni Alyas Nonoy nga ang iya mismo asawa ang isa sa mga dutayan lang man mabiktima ni Llaver.
Suno sa pahayag sini, nga nakasugid ang iya nga asawa nga ginapangayuan ini sang
cellphone number ni Llaver.
Magluwas diri nagtanyag man si Llaver nga sugaton kag idulong ini sa ila nga panimalay sa banwa sang Panitan.
Gindugang pa ni Alyas nonoy nga ginpahog pa ni Llaver ang iya misis nga gipiton ini sa sulod sang CRC sa tion nga indi ini magsunod sa iya nga kagustuhan.
Sa karon luyag sang mga tagreklamo nga mahatagan sang nagakaigo nga aksyon sang pamunuan sang CRC ang ila mga reklamo batuk kay Llaver.
Mahibaluan nga ang ginareklamo nga empleyado sang CRC ang may yara man sang asawa kag professional nga mga anak.
