Daku nga bentaha para sa House prosecution panel ang pagdugang sang panibag-o nga batch sang mga private prosecutors sa pagpresentar sang articles of impeachment batok kay Vice President Sara Duterte.
Sa panayam sang Bombo Radyo kay Raoul Manuel, National Council Member sang Karapatan, ginsiling sini nga positibo nga senyales ang pagdugang sang mga private prosecutors bangud nagapakita ini nga seryoso ang House prosecution panel sa preparasyon para sa palaabuton nga impeachment trial sang bise presidente.
Suno kay Manuel, madamo pa sang mga testigo kag ebidensya nga posible nga ipresentar samtang nagapadayon ang paglilitis, gani indi pa matumod kon ano ang mangin kahimtangan sang kaso sa masunod nga mga pagdinig.
Nagalaom man si Manuel nga kon may madugang pa gid nga batch sang mga private prosecutors, maapil man ang isa ka people’s lawyer nga may igo nga eksperyensya sa pagdepensa sang kinamatarong sang publiko agud mas mapabaskog ang representasyon sang pumuluyo sa impeachment proceedings.
