ROXAS CITY – Luyag ni City Councilor Moreno Gonzaga nga masulosyunan ang problema sa pagduging sang mga commercial sex workers sa siyudad sang Roxas kag ilegal nga operasyon sang pila ka mga balay-kalingawan ukon KTV bars.
Posible ini ang mahinalaan suno sa konsehal sa masunod nga sesyon sang Sangguniang Panlungsod.
Suno diri nga ila paga-imbitahon ang mga katapo sang Bureau of Fire Protection, Roxas City Police Station, City Health Office, City Social Welfare and Development Office kag City Licensing Division.
Ginpahayag ni Gonzaga nga dapat na nga tapnaon ang nagalapta nga mga commercial sex workers nga mga kababainhan sa mga dalanon.
Partikular nga gintumod ni Gonzaga ang Mckinley Street, Magallanes Street kag Roxas Avenue nga mga lugar kun sa diin masami masiplatan ang madamo nga mga commercial sex workers.
Kinahanglan suno sa iya nga ibalik ang sadto anay task force nga nagalibot sa siyudad kun gab-i kag nagasita sa mga nagalagaw sa dalanon ilabi na ang mga kababainhan.
Dapat man suno sa iya nga pang-tsekyaron ang mga balay-kalingawan ukon KTV bars sa siyudad sang Roxas kun legal ang ila nga operasyon.
Nagakadapat suno sa konsehal nga mahibaluan kun kumpleto ang mga ini sa mga rekisitos kag kun may yara sila sang permit to operate.
Dapat man suno sa iya tawgon ang atensiyon sang mga balay-ilimnan nga nagapainom sang mga estudyante kag menor-de-edad ilabi na kun adlaw.
