ROXAS CITY -Liwat nga ginaduso ni City Councilor Midelo Ocampo sa Sangguniang Panlungsod ang pagpanakup sang mga layaw nga ido sa siyudad.
Ini ang ginpabutyag ni Ocampo sang mainterview sang Bombo Radyo.
Ginpahayag ni Ocampo nga madamo sa gihapon ang mga nagakala-aksidente nga mga motorsiklo bangud sa mga layaw nga ido nga nagatabuk sa karsada.
Magluwas diri madamo man ang mga nagareklamo nga ginapangkagat sang mga layaw nga ido.
Suno kay Ocampo nga isa na ka tuig ang nakaligad sang ginpalab-ut niya ini nga problema apang wala sa gihapon naaksyonan sang siyudad.
Luyag sini magpakigsapol sa talatapan sang City Veterinarians Office agud mahinalaan kag masuguran ang pagpanakup sang layaw nga ido.
Samtang nanugunan man ang konsehal sa sitwasyon sang dog pound sa Barangay Dinginan, Roxas City.
Suno diri nga kanugon ang pundo nga ginpain agud ipatindog sang dogpound apang wala man magamit.
Ginpahayag sini nga gamay na gid lang ang pundo nga kinahanglanon agud matapos ang nasambit nga dog pound
