ROXAS CITY – Masubo nga Paskwa ang magasugata sa mga Capizeño kasunod sang pagdula na sang budget allocation sang 24 ka opposition congressmen para sa ila nga infrastructure project sa 2018.
Sa exclusive interview sang Bombo Radyo Roxas kay Capiz 1st District Congressman Emmanuel Billones Sr., ginpahayag sini nga ini ang pinakamasubo nga Paskwa sa iya kag sa mga constituents sa premier distrito bangud gindula na ang P1.7 bilyones nga pondo sa mga infrastructure project.
Suno sa kongresista nga wala magsulod sa iya paino ino nga kasubong sini magdumot ang Duterte administration sa ila mga kasumpong sa pulitika, labi na nga ila nahibaluan nga sa probinsiya sang Capiz, gikan ang nangin kasumpong sini sadto sa pagka-presidente nga si dating Interior Secretary Mar Roxas.
Apang sa pihak nga kalakip ang Magnificent 7, sa diin kalakip diri si Billones sa mga ginkuhaan sang pondo sang administrasyon, nagpanindugan ang opisyal sa ginapakigbato nga prinsipyo kag demokrasya.
Personal man ini nga nagpangayo sang paghangup sa mga kontraktor nga naggasto na sa pagbakal sang mga bid documents, bangud indi na madayun ang proyekto.
Kalakip kuntani sa infrastructure project nga nakalinya para sa nasambit nga pondo ang pagpahimo sang karsada kag tulay, flood control, public kag school buildings kag iban pa.
Apang bilang aksyon sang Magnificent 7 magaapela sila kay President Rodrigo Duterte nga kun mahimo ibalik sa ila ang ginduha nga pondo para sa project allocation sa masunod nga tuig.
