Malinong kag matawhay ang pagsaulog sang All Souls’ Day sa Banica Cemetery sa Roxas City, samtang padayon naman ang pagmonitor sang kapulisan kaupod ang nagkalain-lain nga ahensya agod masiguro ang seguridad kag kaluwasan sang publiko.
Sa interview sang Bombo Radyo kay Police Lieutenant Colonel Rogelio Tomagtang Jr., Chief of Police sang Roxas City Police Station iya ginpahayag nga ikaapat na nga adlaw sang ila security deployment kaupod ang City Disaster Risk Reduction and Management Office (CDRRMO), Bureau of Fire Protection (BFP), Traffic Management Unit (TMU), mga opisyal sang barangay kag iban pa nga stakeholders.
Suno kay Tomagtang, may tatlo ka personnel kag duha ka naka-civilian attire nga ginadeploy sa tagsa ka sementeryo, nga ginasuportahan man sang mobile patrol agud masiguro ang seguridad sang mga nagabisita.
Pahayag pa niya, kada oras ginakuha nila ang sitwasyon kag updates halin sa mga personnel nga naka-deploy agod ma-monitor ang kadamuon sang mga bisita kag ma-adjust ang police deployment kon kinahanglanon.
Nagpasalamat man ang natungdan sa kooperasyon sang tanan nga nagbisita sa patyo kag memorial parks sa ila pagsunod sa mga pagsulundan kadungan sang ila nga pagduaw sa ila mga himata nga nagtaliwan na.
